بەرپرسانی ڕێگاووبان و گومرگی ئێران لە کۆبوونەوەیەکی هاوبەشدا، ڕێکارەکانی خێراکردنی جێبەجێکردنی بڕیارەکانی ئەنجومەنی وەزیران و چارەسەرکردنی کێشەکانی دەروازەی سنووری بازرگانیان تاوتوێ کرد.
لە کۆبوونەوەی بەڕێوەبەری گشتی ڕێگاووبانی ئازەربایجانی ڕۆژئاوا لەگەڵ سەرۆکی گومرگی ئێران، جەخت لەسەر پەرەپێدانی ناوچەی پشت سنووری بازرگان و یەکلاییکردنەوەی پڕۆژە لۆجستیکییەکان کرایەوە. تەوەرە سەرەکییەکان بریتی بوون لە ڕێکخستنی هاتووچۆی بارهەڵگرەکان، زیرەککردنی پرۆسەی پەڕینەوە لە سنوور، دانانی کامێرای چاودێری و تەواوکردنی دیواری دەوروبەری گومرگ. هەروەها جەخت لەسەر دانانی خشتەی کاتی ورد بۆ هەنگاوە کورتخایەن و درێژخایەنەکان کرایەوە بۆ بەرزکردنەوەی توانای بازرگانی دەروازەکە. ئامانج لەم هەنگاوانە کەمکردنەوەی کاتی وەستانی بارهەڵگرەکان و خێراکردنی کارەکانی سنوورە.