İranın Yol və Şəhərsalma naziri Alat-Farab sərhədini ziyarət edərək tranzit çətinliklərini və İranlı sürücülərin problemlərini yerində araşdırıb.
İranın Yol və Şəhərsalma naziri Fərzanə Sadiq Özbəkistana rəsmi səfərinin sonunda nəqliyyat sahəsindəki problemləri yerində izləmək üçün quru yolu ilə Özbəkistan-Türkmənistan sərhədinə gedib. Alat-Farab sərhəd keçid məntəqəsində hər iki ölkənin nəqliyyat və gömrük rəsmiləri ilə görüşən nazir, yol nəqliyyat vasitələrinin hərəkət vəziyyətini və tranzit marşrutundakı maneələri müzakirə edib.
Sadiq həmçinin sərhəddə İranlı yük maşını sürücüləri ilə birbaşa görüşərək, onların sərhəd keçidi zamanı qarşılaşdıqları çətinliklər və narahatlıqları ilə yaxından tanış olub. Bu sahə səfəri sərhəd keçid məntəqələrindəki darboğazları dəqiq müəyyən etmək, İranın yol nəqliyyat donanmasının hərəkətini asanlaşdırmaq və tranzit sahəsində çalışanların qarşısındakı maneələri aradan qaldırmaq məqsədi daşıyır.
